ნავთობპროდუქტების იმპორტიორთა კავშირის განცხადებით:

მსოფლიოში ნავთობის ფასი კვლავ მცირდება. კერძოდ, წლის დასაწყისიდან დღემდე ლონდონში Brent ტიპის ნავთობის ფასი შემცირებულია 5,42 დოლარით/ბარელზე ანუ 14,5%-ით 32,18 დოლარამდე/ბარელზე, ხოლო ნიუ-იორკში Light Sweet ნავთობის ფასი - 4,90 დოლარით/ბარელზე ანუ 13,2%-ით 32,22 დოლარამდე/ბარელზე.

ნავთობის ფასის პარალელურად მცირდება ასევე საერთაშორისო ფასები ნავთობპროდუქტებზე Platt’s-ის მიხედვით, რომელზედაცაა დამოკიდებული საწვავის ფასი საქართველოში, ვინაიდან ჩვენ ვახორციელებთ საწვავის იმპორტს, და არა ნედლი ნავთობისა. კერძოდ. წლის დასაწყისიდან დღემდე საერთაშორისო ფასები ბენზინზე Platt’s-ის მიხედვით შემცირებულია 24 დოლარით/ტონაზე ანუ 5,6%-ით, ხოლო 10PPM დიზელის ფასი - 40,75 დოლარით/ტონაზე ანუ 12,9%-ით.

Platt’s-ის მიხედვით საერთაშორისო ფასების შემცირების პარალელურად საქართველოში წლის დასაწყისიდან დღემდე რამოდენიმეჯერ მოხდა საწვავის ფასის შემცირება, მათ შორის ამ ბოლო 2-3 დღეში.

მთლიანობაში იანვრის თვიდან დაწყებული  ბრენდირებულ ავტოგასამართ სადგურებზე სხვადასხვა კომპანიების მიერ ყველაზე მოხმარებადი რეგულარი ტიპის ბენზინის საწვავის ფასი შემცირებულია საშუალოდ 9-15 თეთრით ლიტრაზე ანუ 6-9%-ით; ხოლო ევრო დიზელის ფასი - საშუალოდ 8-18 თეთრით/ლიტრაზე ანუ 5-10 %-ით.

საერთაშორისო ფასების შემცირების პარალელურად საწვავზე ფასების კლება მომავალშიც გაგრძელდება.