დღეს სასტუმრო ,,Radisson Blu Iveria"-ში საქართველოს სავაჭრო-სამრეწველო პალატასთან არსებულმა საქართველოს საერთაშორისო საარბიტრაჟო ცენტრმა (GIAC) ნავთობპროდუქტების იმპორტიორთა კავშირთან ერთად  ნავთობპროდუქტების ბიზნეს-სექტორში მოღვაწე კომპანიებთან გამართა სამუშაო შეხვედრა თემაზე „არბიტრაჟი – სასამართლოს ეფექტური ალტერნატივა“.

ღონისძიება მიზნად ისახავს არბიტრაჟის, როგორც დავების გადაწყვეტის მექანიზმის შესახებ ცნობადობის ამაღლებას და მისი გამოყენებით დავების გადაწყვეტის უპირატესობების წარმოჩენას სასამართლოსთან შედარებით. ღონისძიებაზე განხილული იქნა არბიტრაჟში დავის განხილვის თავისებურებები საქართველოს საერთაშორისო საარბიტრაჟო ცენტრის მაგალითზე. ასევე, ყურადღება გამახვილდა უცხოელ პარტნიორებთან დავების პრევენციის მიზნით პრაქტიკული თავისებურებებისა და რეკომენდაციების განხილვა.

შეხვედრა გახსნეს საქართველოს სავაჭრო-სამრეწველო პალატის პრეზიდენტმა - ნინო ჩიქოვანმა, საქართველოს ენერგეტიკის მინისტრის მოადგილემ - ილია ელოშვილმა და ნავთობპროდუქტების იმპორტიორთა კავშირის თავმჯდომარემ - ვანო მთვრალაშვილმა. საპრეზენტაციო ნაწილის შემდეგ ღონისძიება კითხვა-პასუხის რეჟიმში წარიმართა.

საქართველოს საერთაშორისო საარბიტრაჟო ცენტრი სავაჭრო-სამრეწველო პალატამ 2013 წელს დააფუძნა. იდეა საერთაშორისო პრაქტიკიდან გამომდინარე გაჩნდა. ორგანიზაციის შექმნამდე  ამ საკითხზე აქტიურად იმუშავეს პალატისა და მისი პარტნიორი ორგანიზაციების წარმომადგენლებმა. ასევე, საარბიტრაჟო ცენტრის შექმნის პროცესში მნიშვნელოვანი როლი სამუშაო ჯგუფმა ითამაშა, რომელიც როგორც სახელმწიფო უწყებების, ასევე მესამე სექტორის წარმომადგენლებისგან შედგებოდა. საქმიანობის განხორციელების პროცესში საქართველოს საერთაშორისო საარბიტრაჟო ცენტრი სავაჭრო-სამრეწველო პალატისგან აბსოლუტურად დამოუკიდებელია.   ცენტრის წესების შემუშავება  წამყვანი საერთაშორისო ექსპერტებისგან   შემდგარი  კომისიის მიერ მოხდა.